South Korea leh US-in military exercise nei ṭan

South Korea leh United States (US) sipaite chuan nimin aṭang khan joint annual military exercise an nei ṭan a, August 28 thleng an nei ang.

He sipai exercise-a a thawhkhatna atan defense lam thlur bing tum a ni a, a thawkhatna hi Inrinni thleng an nei ang. Exercise thawhhnihnaah chuan  counterattack lam thlur bing a ni dawn a, kar leh Zirtawpni (August 28) thleng neih tum a ni a, Combined Command Post Training (CCPT)-ah sipai exercise hi an nei chho mek a ni. 

Ruahman lawk dan chuan ram pahnih sipaiten summertime drill an neih tur hi Pathiannia aṭang khan ṭan tura tih a ni a, mahse South Korean army officer pakhatin Covid-19 hri a kai avangin sawn hlat a ni ta a ni. Covid-19 hri leng mah se, ram pahnih te chuan sipai lama thawhhona ṭha an neih theih nan leh ram pahnih inkara inṭhianṭhatna a awm zel theih nan sipai exercise hi an kaltlangpui a ni. Springtime annual drill an neih tur chu hri leng vangin an lo ṭhulh tawh thung. 

South Korea-ah hian ni nga chhungin Covid-19 hri kai thar mi 991 an awm a, heng zinga a tam zawk chu biakina inkhawmte an ni. Hri kai an pun belh zel avang hian South Korea sipai thuneitute chuan vawiin aṭangin an sipaite chu tun thla chhung atan chawlh lak an khapsak a ni.