China puitua puh US CIA agent hlui man

US-a Central Intelligence Agency (CIA) agent (officer) hlui Andrew Yuk Ching Ma chu China hnenah US thuruk a hralh nia puh a nih vangin man a ni.

Federal Bureau of Investigation (FBI)-te chuan kum 67 mi Andrew Yuk Ching Ma hian kum tam tak chhung US thuruk (secret)-te chu China hnenah a hralh ṭhin niin an tarlang a, US dollar tam tham tak leh thil pek hmangin US thurukte hi a hralh ṭhin niin an tarlang bawk.

Kar liam ta Zirtawpni khan heng puhnate avang hian Ma hi man a ni a, Ma chhui hna hi FBI-te chuan an thawk a ni. Ma hi kum 1982-89 inkar khan CIA agent a ni ṭhin. Ani bakah hian hming tarlan loh kum 85 mi chu Ma thubuai an siamsak anga puh a ni bawk a, ani hi kum 1967-83 inkar khan CIA agent lo ni tawh bawk a ni.

Hetianga inphiarrukna hi kum 2001 March thlaa Hong Kong hotel room a thil thleng chhuina kal zel a ni a, kha hotel room chhungah khan Chinese intelligence official leh CIA officer hlui pahnih te hi an tel nia sawi a ni. He room chhunga an inhmuh hian CIA officer hlui pahnihte hian Chinese intelligence official-te hnenah US thurukte chu an hralh ta niin US justice department chuan a tarlang.

Hotel room chhunga an awm lai leh an thil hralha pawisa an inpe lai hi video-in hmuh tur a awm a, Ma hian US dollar 50,000 a lak laite pawh a lang niin justice department chuan a sawi. Mahse he video hi tu record nge tih erawh justice department chuan a sawilang  lo thung.

Kum 1994-2007 inkara CIA tana thawk ṭhin tho Jerry Chun Shing Lee chu nikum November khan man a lo ni tawh bawk a, ani pawh hi US thurukte chu Chinese intelligence hnenah a pek vanga man niin, kum 19 chhung lungin tang tura hrem a ni.