A zawnin kum hnih chhung China mipui zat tlahniam

China chuan nimin khan annual data tichhuakin, an ram mipui zat chu 2023 kum tawp khan mi tluklehdingawn 1.409 an ni tih a tarlang a, a zawnin kum hnih chu an ram mipui zat hi a tlahniam a ni. Kum 2022 kum tawp aiin mihring tlemna hi mtd 2.08 a tling.

Hun rei tak chhung khawvela mipui tamna ber ram ni reng ṭhin, China hi mihring tam lamah nikum khan India chuan a lehpel tawh a ni.

National Bureau of Statistics (NBS) chuan nikum chhunga nau piang thar zat, birth rate pawh mi 1,000-ah 6.39 chauh a ni tih a tarlang bawk. Kum 2022 khan birth rate hi 6.77 a ni. Kum 1980 chhoa sorkarin an ram mipui pung chak lutuk tur venna atan fa pakhat chauh neih phalna, one-child policy a kalpui hnuah birth rate hi a tlahniam nasa tawh hle a ni.

Mihring punna tlahniam zel avangin kum 2015 khan sorkar chuan one-child policy hi a titawp a, kum 2021-ah phei chaun fa pathum thleng neih a phalsak. Hei bakah hian fa neite tan chhawmdawlna eng emaw a siam zui bawk a ni. Heti chung hian khawsak a hautak avangin an policy thlak hian ṭhangthar lamah nghawng a nei vak lo a, a bikin khawpui lama cheng zingah fa nei duh lo emaw, fa pakhat aia tam nei duh lo an tam hle.

Annual data-ah hian nikum chhunga an ram economy ṭhanna chu 5.2% nia tarlangin, hei hi kum 30 chhunga economy ṭhan muanna ber a ni. Nau piang an tlem zel avangin hnathawk thei rual, workforce group (kum 16 - 59) an pung thei lo a, hetih lai hian kum 60 chung lam erawh kum 2022 aiin mtd 16.93 in an pung thung. Hei vang hian sorkar chuan healthcare leh pension systems lamah a sum hman erawh a pung thung a ni.