Israel-in war budget-ah USD tld 15 dah belh

Israel cabinet chuan Hamas firfiak pawl nen an indo mek karah, Thawhṭanni khan 2024 budget siam ṭhat chu pass-in, war budget-ah shekel tld 55 (USD tld 15) dah belh an remti tih Finance Ministry leh Prime Minister Office chuan a sawi.

Hamas firfiakte'n nikum October thlaa Israel an beih avanga Israel-in Gaza Strip-a Hamas a beihna hi Pathianni khan a ni 100-na a tling tawh a ni. Ni 100 chuang indona a kalpui tawh avangin sum pawh a seng hnem tawh a, hei vang hian defence atan leh, indona tuartute tana zangnadawmna pekna atan budget hi siam ṭhain, sum tam tham tak a dah belh.

Finance minister Bezalel Smotrich chuan reservist leh fighter tinte bakah an chhungte chu sorkarin a enkawl zelna turin an thil dah pawimawh hmasak pawh an siam rem tih a sawi. Sum dah belh tum chungchang hi darkar 24 chuang an sawiho a, minister ṭhenkhat chuan war budget-a sum dah belhna tura an ministry budget cut a ni chu an lawm lo a ni. Health leh internal security budget lak ṭhensakna tur chu sut a nih hnuah an pass thei ta a ni.

Cabinet hian 2024 annual spending atan shekel tld 582 an pawm a ni. Israel hian nikum khan 2023 leh 2024 atan two-year budget a lo pawm tawh a, mahse, Gaza indona thleng avangin budget siam ṭhat leh, sum hman tur dah belhna siam a ngai ta a ni.