Pakistan-in Iran beihna a chhang let
Pakistan chuan an ram chhunga Balochi group, Jaishal-Adl headquaters a rawn kahsak chuan nghawng lian tak a nei dawn tih a sawi hnuah, nimin khan Iran-a firfiakte awmna hmun nia a sawi chu a kap let ve.
Foreign Ministry chuan 'Marg Bar Sarmachar' operation tia an vuah hnuaiah, Iran-a firfiakte bihrukna hmun nia sawi an kahnaah hian firfiak eng emaw zat an thi niin a tarlang. Iran media lam chuan Pakistan-te beihpui thlaknaah hian mi pakua thiin, an zingah hian naupang pali an tel niin an tarlang.
Iran hian Thawhlehni khan Pakistan-a Balochistan province-a Jaish al-Adl hmun pahnih chu missile leh drone hmangin a kap a ni. An chet dan hi na taka sawiselin, Pakistan chuan Iran chu an airspace palzutsakah a puh a, an thiltih chu a nghawng an tuar let tur thu pawh an sawi lawk bawk. Hetianga dik lo taka Iran chetna chhang let tur hian Pakistan chuan dikna a nei a, eng thil pawh thleng zui se a mawhphurtu chu Iran a ni tiin Foreign Ministry chuan a sawi.
Jaish al-Adl hi kum 2012-a din niin, Pakistan leilung aṭang hian Iran ram hi bei ṭhinin, Iran security force-te an bitum ṭhin. Nikum December thla pawh khan Iran police station beiin, mi 11 an thi. Iran chuan terrorist group-ah a lo puang tawh bawk. An province huam chhungah hian mi mtd 15 vel an khawsa a ni.
Nimina Pakistan-in a beihte hi Baloch Liberaton Front (BLF) niin intelligence official chuan a sawi. He pawl hi Pakistan hmar lam, Balochistan province-a indepdence sualtute an ni. Kum tam tak chhung ram hran phutin Pakistan sorkar lakah an hel tawh a, gas project, infrastructure leh security post-te an bei fo a ni.
Iran chuan Pakistan-in an rama beihpui a thlakna chu demin, nimin khan insawi fiah turin Tehran-a Pakistan palai, charge d'affaires chu koh a ni tih foreign ministry thupuangtu Nasser Kanaani chuan a sawi. Pakistan an beih hma hian Iran chuan a ṭhenawm ram dang, Syria leh Iraq-a firfiakte hmun nia a sawi pawh a lo bei tawh a, a chet dan avanga lungawi loin, Iraq chuan Tehran-a an ambassador pawh a ko let nghal bawk.