Eirua puh Singapore Minister a bang

Singapore transport minister, eiruknaa inhnamhnawiha puh, Indian-origin S.Iswaran (61) chuan Thawhlehni khan Prime Minister hnenah minister a nihna aṭanga banna a theh lut.

Minister chuan an puhnate hi phain, an puhna dik lohzia hailan a, a hming an tihchhiatna siam ṭha tura hma a lak chhoh tur thu a sawi.

Hetih lai hian Corrupt Practices Investigation Bureau (CPIB) chuan nikum July thlaa man, Iswaran hi dan kalha chetna thubuai 27 a siamsak a, property tycoon Ong Beng Seng hnen aṭang pawhin USD 286,181 hu thil a dawng niin an puh. Ong hi nikum July thla khan thamna pek chungchangah hian man a lo ni tawh bawk a, mahse, a lakah chargesheet theh luh erawh a la ni lo.

Iswaran hi eiruk thubuai siamsakah hian thiam loh chantir a nih chuan an ram pawisa, Singapore dollar 100,000 thleng chawitir emaw, kum sarih lung in tantir emaw a ni ang.

Singapore sorkar hi eirukna lamah a fihlimin political leader zingah hlemhletna leh eirukna lama hmingchhia an awm khat hle. Hei vang hian Iswaran chanchin hian ngaihven a hlawh hle. Eirukna laka an fihlimna turin civil servant-te pawh hlawh ṭha tak pek an ni a, cabinet minister-te kum khat hlawh hi Singapore dollar mtd 1 chuang deuh vek a ni. Minister zinga eiruk thubuai nei hnuhnung ber chu kum 1986 daih tawhah niin, national development minister chu thamna laa puhin thubuai siamsak a ni a, mahse, court-a a chungthu ngaihtuah a nih hmain a thi a ni.