US-in Yemen-a Houthi hmun bei leh

US chuan Nilaini zan khan Yemen-a Houthi helpawlte hmun a bei leh a,hei hi ṭum li an beihna niin Pentagon official chuan a sawi.

US Middle East Command, Centcom chuan US Navy lawng aṭanga Tomahawk missile hmangin Houthi-ho missile, Red Sea-a sumdawng lawng lian beih an tumnate chu kahsak an ni tih a sawi. US chuan Houthi hi 'global terrorist'-ah a puang tawh bawk.

Houthi hian Red Sea-a lawng liante chu nikum November thla aṭang khan an bei fo a, Nilaini chhun pawh khan US lawng chu tun kar chhunga a ṭum hnihna atan an kap leh a ni. Helpawl hian Gulf of Aden-a M/V Genco Picardy chu one-way drone hmangin an kap niin Centcom chuan a tarlang. Lawng hi hmun ṭhenkhat lai a chhia a, mahse, thawktu zingah erawh hliam an awm lo. Thawhṭanni pawh khan Houthi hian ballistic missile hmangin US lawng an lo kap tawh bawk a ni.

Centcom commander Gen Michael Kurilla chuan Houthi fighter-te'n Red Sea leh a chhehvela sumdawng lawng liante an tihbuai leh, an himna tiderthawng zawnga an chet chhung chuan US chuan a bei let zel dawn tih a sawi.