Ukraine-in an khawpui chhiate din thar hna thawk ṭan

Ukraine chuan Russia nena an indo mek karah, indona avanga khawpui chhiate din thar hna a thawk ṭan leh nghal.

Kum hnih dawn liam taa Russia-in an ram a run aṭangin Ukraine khawpui hrang hrangte'n beih an tawk nasa a, infrastructure tam tak a chhia a ni. Ukraine sorkar chuan pilot programme hmangin khawpui parukte din thar hna hi a thawk dawn a ni. Heng thlan chhuahte hi Russia ramri bul hnaia awm Trostianets, Kyiv khawpui bula Boradianka leh Moschun, hmar lama Yahidne, khawchhak lama Tsyrkuny leh chhim lama Posad-Pokrovske te an ni. Trostianets mayor Yuriy Bova chuan indona avanga tlanchhiate an kir leh a, naupangte pawhin an hma lam hun an dinna hmun tur atana siam leh turin theihtawp an chhuah tih a sawi. Engkim din thar leh vek an tum thu sawiin; cafe, libary, factory, school leh hospital aṭangin bul an ṭan dawn tih a tarlang.

Ukraine sorkar hotute chuan an ram din thar leh hna hi chak taka kalpui a ngai tih an sawi a, a bikin hmun pawimawh hospital, power station leh railway-te rang zawka siam ṭhat an ngai tih an sawi. Hemi rual hian hemi atan hian tha leh sum tam tak a ngai dawn tih an sawi tel bawk. Hetih lai hian Russia chuan a la bei chhunzawm reng bawk.

Prime minister Denys Shmyhal chuan an ram din thar lehna tur hian USD tld 1.6 chuang ruahman a ni tih a lo sawi tawh a, pilot project an siam atan hian USD mtd 86 vel an dawng tawh a, 2024 budget erawh siam a la ni lo.

World Bank chuan Ukraine ram pum din thar lehna tur hian kum 10 chhungin USD tld 400 a ngai dawn niin an sawi a, khawthlang ram hruaitute chuan an theih anga puih an tum thu pawh an sawi. Mahse Russia-in a la beih chhunzawm reng avangin long-term planning siam pawh a harsa hle tih an sawi.