Thailand lal sawiseltu kum 50 tang turin hrem

Thailand appeal court chuan social media lamah an lal chhungkua sawiselna hrang hrang post-tu, kum 30 mi Mongkol "Busbas" Thirakot chu kum 50 tang turin a hrem.

Online clothing vendor, Mongkol hi Chiang Rai province hmar lama cheng niin, an ram lal chhungkua sawiselna thu a post avang hian nikum khan kum 28 tang tura hrem a lo ni tawh a ni. A hremna hi court-ah a appeal a, mahse, appeal court chuan hremna hi pek belhin, kum 28 tang tura hrem a nih tawhna a nemngheh bakah, a hremna hi kum 22 in a lo tihbelh ta zawk a ni.

Thailand hian an lal chhungkua sawisel khapna dan khauh tak, 'lese majeste' law neiin, an vawi khat sawisel lekah pawh kum 15 thleng jail tantir theihna dan an nei. International human rights group-te chuan he dan hi sawisel fo mah se, an ram chhungah khauh takin an kengkawh zui reng tho a ni. Kum 2020 aṭang khan 'lese majeste' law hmang hian mi 262 vel thubuai siamsak an ni tawh.

Mongkol hi social media lamah an ram lal leh lal chhungkua sawiselna post 27 chuang a siam avangin kum 2021, April thla khan man a ni. Nikum January thla khan criminal court chuan dan bawhchhiaa puhna 14-ah thiam loh chantirin, kum 28 tang turin a hrem a ni. Hemi hnu hian Mongkol hian appeal court-ah hremna pek hi ngaihtuah ṭha leh turin a ngen a ni.