NATO-in Cold War hnua drill pui ber buatsaih dawn

North Atlantic Treaty Organization (NATO) chuan Cold War hnua exercise lian ber tur chu kar leh aṭangin a nei dawn a, he drill hian May thla thleng a awh dawn.

NATO top commander Chris Cavoli chuan an drill buatsaih, Steadfast Defender - 2024 hi sipai 90,000 velin an zawm dawn niin a sawi. Lawnglian, aircraft carrier leh destoryer 50 chuang bakah; fighter jet, helicopter leh drone 80 chuang, combat vehicle 1,100 vel, tank 133 leh infantry vehicle 533 an tel dawn bawk niin NATO chuan a tarlang. Steadfast Defence-2-24 chuan Europe venghim tura NATO in a sipaite rang taka a hman theih dante a lantir dawn a ni, a ti.

Drill neih turah hian NATO member ram sipaite bakah, an pawl zawm mai tur Sweden sipaite pawh an tel dawn bawk a ni. NATO-ah hian member 31 awm mekin, heng zingah hian Europe ram 29 leh North America ram pahnih an tel. An headquarters hi Brussels, Belgium-ah a awm a, military headquarters hi Belgium-a Mons bulah a awm bawk a ni. NATO member ramte sipai neih zat hi mtd 3.5 vel nia chhut a ni bawk.