Brazil-ah Covid-19 kai hmuh chhuah tam ber ni thleng
Brazil-ah Ningani khan Covid-19 kai hmuh chhuah thar mi 26,417 an awm a, hei hi Brazil-ah ni khat chhunga hri kai hmuh chhuah tam ber ni a ni.
He hri avang hian Ningani vek khan mi 1,156 an thi bawk. Brazil-a Covid-19 vanga thi zawng zawng hi mi 26,754 an tling tawh a, a zawnin ni thum chhunga Covid-19 vanga thi hi nitin mi 1000 chuang an awm.
Brazil-ah hian hri kai zawng zawng hi mi 4,38,812 an tling tawh a, heng zinga mi 1,93,181 chu enkawl dam tawh a ni. Brazil khawpui zinga mipui tamna ber Sao Paulo chu he hri kai tamna ber khua a ni mek a, he khuaah hian hri vangin mi 6,980 an thi tawh a, hri kai hi mi 95,865 an awm tawh bawk. Rio de Janeiro chu hri kai tamna dawttu a ni a, he khuaah hian hri kai mi 44,886 an awm a, he hri vanga thi hi mi 4,856 an awm tawh bawk.
Colombia-in quarantine kalpui hun pawtsei
Colombia sorkar chuan ram chhunga Covid-19 a darh zel loh nana ram pum huapa quarantine (inkhunghran) a kalpui mek chu July 1 thleng atan a pawtsei.
Ram pum huapa quarantine hi pawhsei ni mah se, hmun ṭhenkhatah chuan inkalpawhna chu khar a ni tawh dawn lo thung.
Colombia-ah hian March 6 kha Covid-19 kai hmuh an awm ṭan a, March 12 khan health emergency puan zui a ni. March thla laihawl aṭang khan inkharkhip (lockdown) chu kalpui ṭan a ni bawk.
May thla tawp hian lockdown hi hlih tum a ni a, sumdawnna te pawh a pangngai anga kalpui tum a ni. Mahse public transport leh thlawhtheihna te chu khap an la ni dawn a, social distancing chu a theih chin chinah hman tum zel a la ni.
Colombia-ah hian hri kai hi mi 25,366 an tling tawh a, heng zinga mi 6,665 enkawl dam tawh niin, he hri vanga thi hi mi 822 an awm tawh bawk.
SKorea-in school khar leh
South Korea chuan an rama hri lengin ziaawm lam a pan avanga school-te a hawn hnuah, hri kai an pun chhoh leh avangin nimin aṭang khan school te hi khar leh anni a, online teaching kalpui a ni leh rih dawn.
Ningani khan SKorea-ah hian Covid-19 kai hmuh chhuah thar hi mi 79 an awm a, thla hnih chuang hnua ni khata hri kai hmuh chhuah tam ber ṭum a ni.
Khawvel pumah Covid-19 kai pun belh zel
Khawvel pumah Covid-19 kai an la pun belh zel a, worldometers-in a tarlan danin nimin thleng khan he hri kai hi mi 59,24,107 an awm tawh a ni.
Hri kai hmuh chhuah tawh zinga mi 25,93,120 chu enkawl dam an ni tawh a, hetihlai hian mi 3,62,459 chu he hri vang hian an thi tawh a ni. Hri kai enkawl mek zinga 53,945 (2%) chu dinhmun ngaihtuahawm nia sawi an ni bawk.
Ram hrang hrang zingah US chu hri kai tamna leh hri vanga thi tam berna ram a la ni chhunzawm zel a, Brazil-in a dawt tawh a ni. Russia, Spain, UK, Italy leh France-te chuan hri kai tam zualna ram an ni bawk a ni.