Israel-in Gaza-a Palestinian ram din thlawp lo

Israel prime minister Benjamin Netanyahu chuan Gaza Strip-a Palestinian ram din chu an thlawp lo tih a sawi nawn leh.

Benjamin Netanyahu hian US president Joe Biden nena telephone hmanga an inbiak hnuah, Biden-a'n Palestinian ram dinna hi a pawm thei mai thei nia a sawi avangin he thu hi a sawi chhuak leh a ni.

US chuan Israel ram bula Palestinian ram din chu an inkar boruak ṭha zawk awm theihna tur niin a ngai. Biden pawhin Netanyahu a Prime Minister chhungin he thil hi a thlen theih a beiseiawm thute a sawi bawk.

Mahse hemi hnu hian Israel Prime Minister Office chuan thuchhuah siamin, PM Netanyahu chu Palestinian ram din chungchangah a ngaihdan a ngai reng tih sawiin, Gaza Strip-a Hamas firfiakte chu nuai chimih an nih hnuah pawh Israel chuan Gaza security chu a thunun zel a ngai a, Gaza chu Israel tan hlauhawm a nih lohna tura an thununna hnuaia a awm chhunzawm zel a ṭul tih chu a ngaihdan a ni tih a tarlang.

October 7-a Hamas firfiakte'n Israel an beih avanga Israel-in Gaza Strip-a Hamas laka beihpui a thlaknaah hian Pathianni thleng khan mi 25,105 an thi tawh niin Hamas rorelna hnuaia health ministry chuan a sawi. Hliam tuar hi mi 60,000 chuang an awm tawh niin a tarlang bawk. Hetih lai hian Hamas-te'n Israel mi an la hren mekte chhuah an nih thuai theihna tura hma la turin Israel mite chuan Netanyahu hi an nawr ve reng bawk a, Tel Aviv leh khawpui dangahte nawrh an huaihawt fo a ni. Hamas-te'n Israel an beih ṭum khan mi 1,300 vel an that a, a tam ber chu civil mi an ni. Heng bakah mi 240 vel an man bawk a, Israel nena inremna lailawk an siamah an mi hren zinga ṭhenkhat chu an chhuah a, mahse, tun thlengin a tam zawk chu an la hreng chhunzawm a ni.

United Nations secretary-general Antonio Guterres chuan Palestinian mipuite tana ram hran dinna tur lo dodal chu thil pawm theih loh a ni tiin nimin khan a sawi. "Palestinian mipuite'n an pual an ram dinna tura dikna a neih chu mi tinin an pawmsak a ngai a ni," a ti.