Myanmar-a inbeihna avangin mi 50,000 chuang tlanchhia

Myanmar khawthlang lam, Chin state-a Palestwa khuaa sipai leh sipai sorkar dodaltu, helpawlte inbeihna avangin tun hnaiah mi 50,000 vel hmun him lamah an tlanchhe tawh niin chhawmdawl hna thawktute chuan an sawi.

Nikum November thla aṭang khan Chin leh a ṭhenawm, Rakhine state-ah hian Arakan Army (AA) leh sipaite hi an inbei a, AA hian helai bial chhunga military outpost leh camp 24 chu sipaite kut aṭang hian a laksak tawh a ni. Bangladesh ramri aṭanga km 18 vela awm, mi 97,000 vel chenna Paletwa khaw pum chu an kutah a awm thu an sawi bawk.

Sipaite leh helpawlte inbeihna avang hian tualchhung mite'n harsatna nasa tak an tawk a, mi 50,000 chuang chu hmun dangah tlanchhiain; ei tur, awmna tur, damdawi leh ni tin khawsakna tur mamawh dangahte chhawmdawl ngaiin an awm mek. Chhawmdawl hna thawktute chuan ei tur chauh ni loin, khawvawt tak hnuaia an intuamhlawmna tur mutbu leh thawmhnaw lumte an mamawh hle a ni, an ti.