China rama sikul kângah zirlai 13 an kâng hlum

China-a Henan province-ah Zirtawpni liam ta zan khan school pakhatah kangmei a chhuak a, dormitory-a mu zirlai 13 an kang hlum. Kangmei chhuah chhan hi thuneitute chuan an chhui chiang mek.

Kangmei chhuahna hmun hi Yanshanpu khuaa Yingcai School a ni a, an ram huna zan dar 11 velah kangmei hi chhuakin, minute 40 hnuah fire department lamin an ṭhelh mit thei a ni. Zirlai 13 an kang hluma, mi dang pakhatin hliam na tak a tuar bawk. Kangmei chhuak avanga thi zirlaite hi third grade zirlai vek niin, kum 9-10 te an ni.

School-a kangmei chhuah chhan tak hi hriat chian a la ni lo a, local media report ṭhenkhat chuan electric heater aṭanga chhuak niin an sawi. Yanshanpui hi Shanghai aṭanga km 850 vela hla, Nanyang khaw daia awm a ni.

China ramah hian building himna lam ngaihthah a nih avangin kangmei chhuak leh chhiatna dang thleng hi a awm fo a, nikum November thla pawh khan Shanxi province-a coal company office-ah kangmei a chhuah avangin mi 26 an thi. Hemi hma hian China hmar thlang lama barbecue restaurant-ah thil puak vangin mi 31 an lo thi tawh bawk.