George Floyd thah vangin Minnesota-ah emergency puang

George Floyd thah a nih avangin US-a Minnesota state khawpui lian ber Minneapolis-ah Nilaini zan khan buaina a chhuak a, he buaina hi a punlun zel avangin Minnesota Governor Tim Walz chuan state emergency a puan phah.

Minneapolis khuaah hian Thawhṭanni khan mi ngo police officer pakhatin mi hang kum 46 mi George Floyd chu a man a, an police car ke hnung lam bulah bawkkhup tir chungin a khupin a nghawngah a ṭhingṭhit hnan a ni. He thil thleng lai hian Floyd chuan a thawk ṭhat theih loh thu sawiin, hemi ni Thawhṭanni tlai khan police custody-ah a thi zui ta a ni.

He thil thlengah hian Minneapolis police officer pali chu inhnamhnawiha  puh an ni a, heng police officer-te hi man an ni tawh bawk. US president Donald Ttrump chuan he thil thleng hi a duh loh thu sawiin, FBI chuan theih­tawpin he thil thleng chungchang hi an chhui chian dawn thu a sawi.

Floyd chunga thil thleng avang hian Minneapolis khaw mipuite chu an thinrim hle a, pawikhawihtu police-te lakah rorelna dik an phut a ni. Mipui thinrim chuan khawlaia police car tlan pahnih chu lo dan tumin an car darthlalangte chu an tihkek sak a, mahse police car pahnih hi an kal bo hman a ni. 

Buaina hi Nilaini zan aṭang khan a punlun chho zel a, Minneapolis khua bakah hian Denver, New York leh Oakland-ahte he thil thleng duh lohna hi lantir a ni. Minneapolis Mayor Jacob Frey chuan buaina a punlun avang hian Minnesota Governor Tim Walz hnenah ṭanpuina an mamawh thu a hrilh a, hei vang hian Walz chuan Minnesota National Guard-te chu buaina chhuak ti reh turin a hriattir nghal a ni. Tim Walz chuan Floyd thihna hian rorelna dik a thlen dawn thu sawiin, an khuaa buaina thleng chu pawi a tih thu a sawi bawk.