Brazil President thlawptuten kawng zawh

Brazil-a eptu pawlten an ram President Dilma Rousseff-i paihthlak tuma kawng hrang hranga an nawr mek laiin, Ningani khan President thlawptute chuan Rio de Janeiro-ah kawng an zawh.

Kawngzawhnaah hian tel an ṭhahnem hle a, Congress-a President banna tur kalpui a nih theihna chhan tur a awm lo tih sawiin, democracy humhim tura an beih zel tur thu an sawi.

President term hnihna hmang mek, Rousseff-i hi kum 2014 inthlan dawn a campaign-ah sum lama Brazil-in harsatna a tawh mek chungchang thup tuma budget khawih danglamah an puh a ni.

Eptuten Congress-a President paihthlak a nih theihna tur kalpui tura an nawrna hi Chamber of Deputies commission chuan a zirchiang mek a, Nilaini khan eptu aiawhte koin thu an zawtfiah a, Ningani khan sorkar lam aiawhte an ko ve leh bawk.

Commission hian President paihthlak phutna hi kaltlangpui a remtih chuan chamber-ah a thlen ang a, vote lak a ni ang. Chamber-a deputy 513 zinga hmun thuma ṭhena hmun khat, 342 in vote lak hi an remtih a ngai dawn a ni.