Ram danpui palzutah SAfrica President puh

South Africa Constitutional Court-ah an ram President Jacob Zuma chu ram danpui palzutah puhin, a mimal in cheiṭhatna atana a sum hman chu rul turin a hriattir.

Public Protector Thuli Ma-don-sela chuan President Zuma hi a in cheiṭhatna atana sorkar sum a hmante pe kir leh turin a ti a, mahse he hi a pek duh loh avangin Constitutional Court-ah thlen a ni ta a ni.

Constitutional court judge 11-te chuan Public prosecutor thu thlen hi an ngaihtuah hnuah, lungrual taka thutlukna siamin President chu an ram danpui vawng him zo lo leh zah loha an puh a ni.

Constitutional Court-a Chief Justice Mogoeng Mogoeng chuan Natonal Treasury hnenah ni 45 chhunga sum senral zat report turin a hriattir bawk.

Kum 2014 khan anti-corrup-tion watchdog Madonsela chuan Nkanlda-a President inah hian swimming pool, ran vulhna hmun, amphitheater leh visitor center-te siam a nih thu a sawi a, hengte hi non-security item an nih avangin President hian a senso hi a mimal sum aṭangin a pe tur a ni, a ti.

Eptu party, Democratic Alliance (DA) hotu, Mmusi Maimane chuan court thupek siam chu lawmawm a tih thu a sawi a, President chu paihthlak a nih ngei tur thu a sawi. Maimane chuan, "President Jacob Zuma ni ila chuan ka banna lehkha thehlut turin ka inpeih ang. A thiltih hi ram danpui palzutna lian tak a ni a, President a nihna aṭanga paihthlakna tham a ni" a ti.