Syria President-in inthlan buatsaih hma a duh

Syria President Bashar al-Assad chuan a hma thei anga an ram President thlanna buatsaih chu a hnial lo tih a sawi.

Russia state media-in President Assad-a kawmna a tihchhuahah he thu hi a sawi a, Syria mipui tam zawkin an duh a nih chuan a term hman mek a ral hmaa inthlan buatsaih chu a pawi tih loh thu a sawi. Assad chuan, " Mipui tam zawkin President thlanna buatsaih hma hi an duh a ni chuan, hnialna ka nei hran lo e" a ti.

Assad hi kum 2014 June thla khan President atan hian thlan nawn a ni a, hemi ṭum inthlanahhian vote tla aṭangin 90% a hmu pha a ni. Mahse eptute leh khawthlang ramte chuan vote tih-chingpen nia sawiin, dik lo taka tlinga puan niin an puh thung.

Syria President term hi kum 2021-a tawp tur a ni a, mahse khawthlang ram leh eptu pawlte chuan thla 18 chhung ngeia President leh Parliament inthlan hi buatsiah turin an nawr a ni. Inthlan neih hunah President Assad hian a chuh leh thei dawn em tih pawh hriatchian a la ni lo.

Kum 2011-a eptuten President Assad leh a kaihhruai sorkar bang tura phuta nawrh an huaihawt aṭang khan Syria ramah hian tualchhung buaina a thleng chhunzawm reng a ni. Buaina chhuak vang hian mi tam tak an thih bakah mi nuai nga chuang chu ram dangah himna zawngin an tlanchhe tawh bawk.