Libya hrekna hlih dan ngaihtuah dawn

United Nations chuan Libya ramah UN thlawp sorkar a ding leh a nih chuan sum lama an ram hrekna siam mek hlih a nih theih dan a ngaihtuah dawn tih a sawi.

Libya ram hrek a nih vang hian wealth fund, dollar tluklehdngawn 67 vel chu UN hian kum 2011
aṭang khan a khuahkhirh sak tawh a ni. He hrekna hi Libya hruaitu hlui, Muammar Gaddafi-an a khawih chingpen tur venna atana siam a ni.

Ningani khan UN Security Council chuan sum lama hrekna siam thar lehin, Libya rama UN thlawp sorkar chu pawm turin eptu lam chu a phut a ni.

Kum 2011-a Muammar Gaddafi paihthlak a nih hnu khan Libya tualchhung dinhmun hian ngai a la awh thei lo. Sorkar pahnih dingin, helpawl thlawp eptu pawl ṭangrual sorkar chuan an ram khawpui Tripoli an thunun a, khawthlang ramten an thlawp sorkar Tobruk-ah a ding thung a ni.

Nikum Decembe thla khan eptu pawlte hian sorkar
inṭawm siam remtiin inremna thuthlung pawh an ziak a, mahse tun thlengin eptu lam puitu helpawlten an thlawp lo thung. Inremna an siamah hian member pakua awmna Presidency Council an din a, Unity Prime Minister Fayaez Sarraj pawh a tel a ni.

Sarraj hi a deputy te nen Nilai-ni khan Tripoli an thleng a ni.