China-ah leiminin mi 47 a chhilh

China chhimthlang lam, Yunnan province huam chhung, Liangshui khuaah nimin zing khan leimin nasa tak thlengin, mi 47 vel a chhilh. Chhanchhuaktu pawl chuan leiminin a chilh, in 18-a chengte chhanchhuah hna hi an thawk nghal a ni.

He chhiatna thlen hun hi an ram huna zing dar 6 hma nia sawi a ni a, leimin hi a chhan hriat chian a ni lo a, mi 500 chuang hmun him lama thiar chhuah tawh an nih thu thuneitute chuan an sawi.

Yunnan province hi tlang sang tak tak awmna hmun a nih avangin leimin lakah an him lo hle. Tun hnaia China ram chhunga khuarel chhiatna hrang hrang thleng leh khaw vawt nasa tak (cold wave) tawk mek zingah he province pawh hi telin an buai hle a ni. China vice premier Zhang Guaoqing chuan nimin khan leiminna hmun hi tlawhin, chhanchhuah hna thawh dante a enpui nghal a ni. Chhanchhuah hna hi mi 200 chuangin thawkin, firefighting machine 33 leh loading machine 10 an hmang. China prsident Xi Jinping chuan leiminin a chhilhte lak chhuah vek an nih theihna tura hma la turin thupek a tichhuak bawk.

China-ah hian thla liam ta khan Gansu leh Qinghai province inkarah magnitude 6.2-a nain lir a lo nghing tawh bawk a, lirnghingin chhiatna a thlenah mi 149-in nunna chanin mi 1,000 chuangin hliam an tuar a, chenna in 14,000 lai mai a tichhe bawk a ni. China rama kum kua chhunga lirnghingin chhiatna a thlen nasat ber ṭum a ni.