US-ah thlasik thlipui avangin mi 90 dawnin nunna chan

Thlasik thlipui (winter storm) a tleh nasat avangin kar liam ta chhung khan US-ah mi 90 dawnin nunna an chan.

US state zingah Tennessee leh Oregon-te chu a tuar nasa zual niin, hemi state pahnih aṭang hian mi 40 chuang in nunna an chan a, state dang Illinois, Pennsylvania, Mississippi, Washington, Kentucky, Wisconsin, New York leh New Jersey-ahte khaw vawt avanga nunna chan an awm bawk. Portland, Oregon-ah chuan thlipuiin thirban a lenthluka current leak-in mi pathum a man avangin an boral bawk.

Khawvawt hian eng chhit tur thlenga nghawng neiin US state tam tak chuan power supply-ah harsatna an tawk a ni. Chenna in nei lo khawlaia riak ṭhinte chuan khawvawt avang hian harsatna an tuar nasa zual a, an nunna atan pawh a hlauhthawnawm zual a ni. Veivahna kawngah pawh harsatna thlengin, kar liam ta chhung khan thlasik thlipui tleh vang hian fight 1,100 chuang cancel-in, flight 8,000 vel tihkhawtlai a ngaih phah bawk.