Brussels Airport hawng leh ta

Firfiakten March 22-a Belgium khawpui, Brussels-a airport leh metro station-a bomb an tihpuah hnuah airport hi khar zui nghal a ni a, ni 12 an khar hnuah nimin khan an hawng leh ṭan ta.

Brussels Airport Co., CEO Arnaud Feist chuan airport hawn ṭan leh ni hian Brussels Airlines thlawhtheihnate chu Athens bakah Italy-a Turin leh Portugal-a Faro-ahte thlawh tir nghal an nih thu a sawi. Vawiin
aṭang hian airport hi dan pangngai anga kalpui a ni tawh ang a, darkar khatah khualzin 800 lut leh chhuak a dawng thei a ni.

March 22-a airprot leh metro station-a firfiak pathumin thihchilh bomb a tihpuah avang khan mi 32 an thih bakah midang 270 in hliam an tuar a ni. Islamic State (IS) firfiak pawl chuan bomb tipuaktute hi an pawl mi leh sa niin an chhal.

Belgium Federal police thupuangtu, Michael Jonniaux chuan airport-ah venhimna kalphung thar hmang tura thupek tihchhuah a nih tawh thu a sawi. Airport-a kal tur motor-te uluk taka enfiah te, terminal pawn lama drop-off parking area khar te, khualzin zawng zawng chu terminal building an luh hmaa an ID, travel document leh bungrua-te uluk taka screening neih vek tura tih a ni, a ti.

Airport-a bomb tipuaktute hian an suitcase-a bomb chak chi leh perekte keng chungin check-in area hi an pal≠tlang thei a, hei vang hian pawikhawihna a thlen tawh lohna turin venhimna lam khauh zawka kalpui an tum a ni.

Feist chuan bomb puakin terminal a tihchhiate chu siamṭhat fel leh vek a nih hma chuan khualzin chhuak turte chu an awmna tura an siam lailawkah an awm thei dawn a, heta ṭang hian check-in neihna tura a bika hmun an siam an pan leh dawn a ni.

Brussels Airport-ah hian a tlangpuiin nikhatah fligth 600 vel a awm ṭhin a, February thla khan khualzin maktaduai 1.5 vel a lo dawng a ni.