CAR President-in PM thar tur ruat

Central African Republic president Faustin-Archange Touadera chuan a campaign director hlui, Simplice Sarandji chu an ram prime minister thar atan a ruat.

President office chuan thuchhuah siamin, prime minister tana Sarandji ruat a nih thu hi a sawi a, mahse PM thar hian cabinet member tur a tihfel hun tur a la hriat loh a ni.

CAR ah hian kum 2013-a Muslim helpawl, Selelka ten sorkar an paihthla hnuah sorkar nghet a la ding thei lo a ni. February inthlanah khan prime minister hlui leh mathematics teacher, Touadera hi President atana thlan a ni. Kum hnih chuang zet tualchhunga pawl hrang hrangte inbeihna leh politics buaina pawhin ziaawm lam a pan theih ngei beisei a ni. Tualchhung buaina thleng vang hian mi tam tak an thih bakah, mi maktaduai khat vel chu himna zawngin an tlanchhe bawk. Buaina vang hian kawng hrang hrangin an ram dinhmun a nghawng a, loneitu tam takte an tlanchhiat avang≠in an thlai thar thlengin a nghawng buai a, thil man pawh a san phah hle.

World Food Programme chuan kumin March thla khan CAR-a cheng mipui zinga a zahve dawn chu an ṭam mai dawn niin a tarlang. WFP country director Bienvenu Djossa chuan kum 2015 aṭang khan ei leh in lama harsatna tawk mipui hi an punbelh nasa hle niin a sawi.

Touadera chuan an rama remna leh muanna, hmasawnna thlen turin theihtawp chhuah a tiam.