Palmyra-ah thlan hmuchhuak

Syria sipaiten Islamic State (IS) firfiak kut aṭanga an lak let, Palmyra khuaah chuan a ruala mi 45 phumna thlan lian tak an hmuchhuak.

Syria sipaite hian Russia puihnain Palmyra khua hi an la let tawh a, khawpui chhung aṭang hian firfiakte pawh an tlanchhe tawh a ni. Sipaite chuan khawpui chhung leh a chhehvel an endiknaah Palmyra hmarchhak lamah thlan lian tak hi an hmukchhuak tih an sawi. He thlana ruang an hmuh hi civil mi leh Syria sipaite ruang nia sawi a ni bawk.

State news agency SANA chuan thlana ruang an hmuh zingah hian hmeichhia leh naupangte ruang pawh a tel a, an zinga ṭhenkhat chu an lu tan sak an nih thu a tarlang.

Nikum May thla khan IS hian Sysria sipaite kut aṭangin Palmyra khua hi an la a, khawpui an lak aṭanga ni li chhungin mi 400 vel an that hman niin state media chuan a tarlang bawk.

Syrian Observatory for Human Rights chuan IS-te hian khawpui an awp chhung hian mi tam tak an that a, an mi thahte ruang hi khawpui pawn lamah an phum ṭhin niin a sawi. Observatory chuan kar kalta Inrinnni khan IS leh Syria sipaite hi Palmyra khawthlang lama Qaryatain bialah an inbei chhunzawm leh niin a sawi a, he hmunah hian Russia thlawhtheihna chuan Syria sipaite puih nan bomb a thlak bawk.