Greece aṭangin raltlante thawn kir ṭan

European Union leh Turkey-in inremna an lo siam tawh angin, Greece rama raltlan lutte chu nimin aṭang khan Turkey-ah lawng hmangin thawn kir
ṭan an ni.

Raltlante hi Turkey khawthlang lam, Dikili-ah hruai a ni a, nimin khan mi 500 thawn kir hman beisei an ni.

EU-Turkey chuan raltlan pung chak lutuk avanga Greece in harsatna a tawh mek sutkian≠na kawng khat atan inremna hi an lo siam tawh a, he innremna siam hi rights group hrang hrang chuan an sawisel a, Greece-a raltlan awm mekte chu inremna siam chungchang hi hriattir an ni lo a, an zinga ṭhenkhat chuan hruaikir an ni dawn tih pawh an hre lo a ni, an ti. Hei bakah raltlante tan Turkey chu a him lo niin an sai bawk.

Inremna an siamah chuan dan loa Greece rama raltlan lut emaw, Greece sorkar hnena inhumna dil, sorkarin a phalsak lo chunga awm luite emaw chu hruai chhuah tura tihte hi an ni. Raltlan hruai kir zingah Syria mi an awm a nih chuan, Syria mi hruaikir ang zat Turkey rama awmte chu Europe ram dangah sawnchhuah an ni ve thung ang. He inremna kalpui a nih theih nan hian Turkey chuan EU aṭang hian sum lama puihna pawh a dawng a ni.

Nimin raltlan hruai kirte hi Greece-a Chios thliarkara awmte an ni a, a thawh khatnaa hian mi 136 hruai kir niin, an zinga a tam ber Pakistan mi an ni.

Greece ramah hian dan loa raltlan lut an la punbelh reng a, March thlaa EU-Turkey ten inremna an siam hnuah pawh nitinin raltlan hi 400 vel an la lut reng a ni. Mahse Greece hian a ram hmarlam ramri te a khar avangin ramri bulah mi sing tel an tangkhang mek bawk.

Nikum chhung khan Turkey aṭangin Greece-ah hian pem lut leh raltlan lut mi maktaduai khat chuang an awm a ni. Heng zinga tam tak chuan Greece aṭang hian Germany bakah Europe hmarlam ramte an pan leh ṭhin a ni.