Tax document leak-ah ram hruaitu tam tak hming lang

Panana law firm tax document maktaduai 11.5 zet chu a put chhuak a, khawvel mi hausa tam takin chhiah awl theihna tur sum an chheprelh dan hriatchhuah a ni.

Document leak aṭang hian chhiah awl theihna tura sum chheprelh tu zingah hian khawvel ram hruaitu, politician leh celebrity-te hming eng emaw zat a lang tel a ni.

He document leak chungchang hi media group 100 chuang zetin an chhui zui. Document-te hi Panama law firm, Mossack Fonseca aṭanga chhuak a ni a, he firm hian ram 35 chuangah office neiin, kum 40 chhunga a client-ten ram dangah sum an dah dan document tam tham tak hi a putchhuak a ni.

Document ah hian ram khat hruaitu lu ber ni lai leh a hlui mi 12 an lang tel a, an zingah hian Iceland leh Pakis≠tan Prime Minister te, Ukraine president, Saudi Arabia lal baka infiamm leh lemchan thiamte pawh eng emaw zat an tel a, Barcelona forward Lionel Messi leh actor Jackie Chan te pawh an lang a ni.

China President Xi Jinping leh a chhungte chu ram pawn lamah account nei zingah an tel a, Iceland PM chuan an ramin sum lama harsatna nasa tak a tawh mek laiin ram pawn lamah dollar maktaduai eng emaw zat hu bank bond a nei.

Document hi International Consortium of Investigative Journalists (ICIJ) in a tichhuak a, hetiang thil liantham hi puanzar a la ni ngai lo niin a sawi. Hetihlai hian firm dintu zinga mi, Ramon Fonseca chuan document an ti leak sak chu pawikhawihna leh inphiarna tenawm tak, Panana beihna a ni, a ti. Ramon Fonseca chuan an company-in chak taka hma a sawnna chu ram ṭhenkhatin an hua niin a sawi bawk.

US sorkarin dan dik la thiltia a puh, blacklist-a tel mimal leh company 33 chu document-ah hian an lang tel bawk. Bank, law firm leh rampawn lama sum dahte chuan danin a phut ang an zawm lo fo tih document aṭang hian a lang niin ICIJ chuan a sawi bawk.