Gaza-a Hamas-te'n an beihnaah Israel sipai 21 an thi

Israel sipai chuan thuchhuah siamin, Thawhṭanni khan Gaza Strip-a Hamas firfiak-te'n an beihnaah Israel sipai 21-in nunna an chan thu an tarlang. Hei hi sipaite'n khawmual lama beihpui an thlak hnua ṭum khata an thih tam ber ṭum a ni.

Israel Defence Force (IDF) thupuangtu, Daniel Hagari chuan sipaite tawmna in bula tank chu Hamas-te'n rocket leh grenade hmangin an bei tih a sawi. Sipaite hian heng building-te hi tihchhiat tum mek an nih avangin puak thei thil eng emaw zat a awm sa a ni. Palestinian firfiakte hian tank hi kapin, building-a puak thei thil awmte chu nasa takin an puak zui bawk a ni, a ti. IDF chuan thil thlen dan chu chhui chian a la nih tur thu an sawi bawk.

He thil thlenna hmun hi Israel chim lam ram dep, ramri aṭanga meter 600 vela hlaa Kissufim bul hnai a ni. Hagari chuan Israel sipai nunna chan tate chu October 7-a Hamas-te'n Israel chhim lam an beih hnua heng hmuna chengte hmun him lama thiar chhuah hna thawktu, reservist vek an ni tih a sawi. Thawhṭanni vek khan Gaza chhim lam, Khan Ounis khuaa inbeihnaah Israel sipai pathum an thi bawk a ni.

Israel president Isaac Herzog chuan X lamah zing kar lungchhiatthlak a nih thu a sawi a, Israel mipui zawng zawng aiawhin nunna chan chhungte chu a tawrhpui thu leh ṭawngtaina lama an hriat reng thu a tarlang a ni.

Hetih lai hian Hamas thuhnuaia awm, Gaza-a health ministry chuan Israel-in sipai chakna hmanga Gaza-a beihpui a thlaknaah mi 25,295-in nunna chan tawhin, a tam zawk chu naupang leh hmeichhia an nih thu an tarlang. Israel chuan Hamas firfiakte chu nuai chimih vek a, an mi hrente pawh chhanchhuah vek a tum tih a sawi. Mahse thla thum zet Gaza Strip-a beihpui a thlak hnuah, an thil tum hi an la tihlawhtling thei bik lo.

Israel defence minister Yoav Gallant chuan an sipaite tawrhna chuan nasa zawka chet lak a ṭul zia a tilang a ni tiin, indona an hmachhawn mek chu Israel hma lam hun siamtu tur a ni a, sipaite inpekna chu an thil tum tihhlawtling turin a nawr mek a ni, a ti.