Mipui lungawi loin Israel Parliament meeting tibuai

Palestinian firfiak pawl, Hamas-te'n October 7-a Israel an beih ṭuma an mi man, tun thlenga an la hren mek chhungte chuan Thawhṭanni khan Jerusalem-a Israel Parliamentary committee session neih chu luhchilhin an tibuai. Thuneitute hnenah an chhungte, Hamas kuta la awm mekte chhuah an nih theihna tura nasa zawka hma la turin an phut.

Parliament meeting neih lai luhchilhtute hi Hamas mi hren mek chhungte mi 20 vel niin, prime minister Benjamin Netanyahu-a'n Hamas nena mi tang inthleng chungchanga inremna neih a duh loh chu an lungawi lo a ni. Pung khawm zinga nu pakhat chuan Hamas te'n Oct. 7-a Israel mi 243 an mante zinga a chhungte pathum thlalak chu a keng lang bawk.

Nikum November thla khan Israel leh Hamas-te hian inbiak remna an neih hmangin mi tang an inchhuah tawnsak a ni. Hemi ṭum hian Hamas hian an mi man zinga mi 100 vel chhuahin, mi 130 vel an la hreng mek nia hriat a ni. IDF chuan Hamas-hoin an thu dawnna aṭangin Hamas mi hren zinga mi 28 chu an thi tawh niin an sawi.

Parliament luhchilhtute hi thawktute chuan an lo dang a, mahse, panel chairman Mohse Gafni chuan an meeting neih lai chu titawp lailawkin, pung khawmte thinrimna chu bengdaih tumin hma a la a ni.