US leh Britain sipaite'n Houthi pawl hmun bei leh

US leh Britain sipaite chuan Yemen-a Houthi helpawl hmunte chu Thawhṭanni zan khan an bomb leh. Hei hi ram pahnih sipaite'n Houthi laka joint strike an neih ṭum hnihna a ni.

Official-te chuan US leh UK sipaite hian Tomahawk missile leh fighter jet hmangin Houthi missile chhekna hmunte an bei tih an sawi. Ni 10 liam ta khan ram pahnih siapite hian warship leh fighter jet hmangin Yemen-a Houthi pawl hmun beiin, hmun 28 vel an lo kap tawh bawk. Hei hi Houthi-hoin drone leh missile hmanga Red Sea-a sumdawng lawng liante an kah hnua an beih lehna hmasa ber a ni bawk.

Britain prime minister Rishi Sunak leh US president Joe Biden-te chuan Red Sea himna turin sipai chakna hmanga Houthi beih let chu a ṭul anga kalpui zel an remtih thu an lo sawi tawh a ni.

Hetih lai hian Houthi helpawl chuan Red Sea an beihna chhan chu Israel-in Gaza-a beihpui a thlak vang a ni tih sawiin, Palestinian mite an thlawpna an lantirna niin an sawi. Nikum November thla aṭang khan Red Sea-a sumdawng lawng liante an bei fo a, hei vang hian tuipui lama insumdawn tawnnate tibahhlahin, global economy thlenga a nghawng hlauhthawnna a lian hle.