Canada-in kum 2 chhung international student visa khuahkhirh dawn

Canada sorkar chuan kum hnih chhung atan international student visa pek chhuah chungchangah khuahkhirhna a siam dawn.

Immigration minister Marc Miller chuan he khuahkhirhna siam hnuaiah, kum 2024 chhunga study visa pek chhuah hi 35% in a tlem dawn tih a sawi a, kumin chhunga permit pawm thar hi 3,64,000 vel a nih rin a ni. Nikum khan study visa hi 5,60,000 dawn an pe chhuak.

Kum hnih chhung study visa hi khuahkhirhin, nakkuma permit pek chhuah tur zat pawh kumin kum tawp lamah puan a ni dawn tih Minister chuan a sawi. Minister chuan, "Canada rama rawn luh tawhte insawhngheh leh, international student pung chak lutuk venna atan he khuahkhirhna hi siam a ni," a ti. International student pung chak hian Canada ramah in luah tur indaih lohna thlengin a thlen nia sawi a ni.

Kum 2022 khan international student 8,00,000 hnenah temporary study visa pek a ni a, nikuma pek zat tak hi sawi chian la ni lo mah se, Miller chuan kum 10 liam ta ai khan a let thum zetin an tam tawh niin a sawi. Kum 2022 khan Canada rama study permit neia lut zingah India chu a tam zual 10 zingah telin, hemi kum hian zirlai 3,19,000 zet an awm.