New Zealand PM hlui Clark-i'n UN SG chuh dawn. Germany, India, Japan leh Brazil te permanent member-a dah a tum

United Nations Secretary General thlan turah New Zealand prime minister hlui Helen Clark chuan a chuh dawn a; thla eng emaw zat enthlak a nih hnuah UN SG a chuh tur thu hi a puang chhuak a ni.

Helen Clark hi tunah hian UN-a Development Programme hotu ber a ni mek a, UN Secretary General chuh a tum thuah BBC chuan kawmin, hetah hian UN-a siamṭhatna a kalpui dan tur rua≠hmanna a sawi chhuak. Siamṭhatna a kalpui dan tur a tarlanah hian Germany, Japan, India leh Brazil te chu UN permanent member-a lakluh a duh thu a sawi.

Clark chuan kum zabi 21 kan chuankai tawhah hian Africa aṭangin ram pahnih tal permanent member-a dah luh ‚wm a tih thu a sawi a, UN security council chhung chu siamṭhat a, Germany, Japan, India leh Brazil te permanent member-a dah luh an ngai a ni tih a sawi. Tunlai khawvela muanna leh himna chungchangah UN hian hmanraw thar a hman a ngai tawh niin a sawi bawk.

Clark chuan, "Security council hian kum 1945 chhoa khawvel inlumleh dan aṭangin tunlai khawvel hi a la teh a, kei chuan tuna kan nun kan hman mekna, kum zabi 21 mila thil kan thlir a hun tawhin ka hria a ni," a ti. A hmain Clark hian UN SG chuh tur hian a inringtawk hle tih a lo sawi tawh a, New Zealand ram leh UN-a kum 30 chhung vel zet hna a lo thawh leh tawnhriat a lo neih tawh chuan nasa takin inrintawkna a siam a ni a ti.

UN hian secretary general hi pakua a nei tawh a, an vai hian mipa vek an ni. Tuna SG ni lai, Ban Ki Moon hi kum 2011-a thlan tlin kha a ni a, term hnih chhung SG hna hi chelh tawhin, kumin December thla hian a hun a tawp dawn a, a hmun ruak luah khat tur hian hmeichhe pathum leh mipa pali ten hming an pe. Chuh tumte zingah hian tuna UNESCO-a an chief, Bulgarian mi, Irina Bokova leh UN High Commissioner for Refugees ni mek, Portugal-a mi, Antonio Guterres te an tel.