Khawvelin Panama Paper Leak a ngaihven zui

Panama-a law firm, Mossack Fonseca aṭanga lehkha pawimawh put ru chuan nghanwg a nei lian hle zel a, Iceland-ah chuan an prime minister chu b‚ng turin an ph˚t nghal a, ram hrang hrangah pawh zawhna a tamin, miin an ngaihven zui hle.

Mossack Fonseca lehkha put ruah hian tuna ram hruaitu ni mek leh ram hruaitu lo ni tawh ṭhin te, mi challang tak takte nen sum chheprelh leh chhiah awlruk thuah inzawmna an lo neih tawh dante a lang a ni. He lehkha a put chhuah aṭangain ram hrang hrangten an chhui zui a, chung zingah chuan France, Austria leh Netherlands te pawh an tel.

He lehkha pawimawhah hian Russia president Vladimir Putin chu dollar tluklehdingawn sum chheprelh leh chingpen kawngah inhnamhnawih ngeiin a lang a, Iceland prime minister Sigmundur David Gunnlaugsson chu a nupui hausakna namen lo hausakna nen inzawmna neiin a lang bawk. He thil avang hian Thawhṭanni chawhnu khan Iceland-ah chuan an PM b‚ng tura nawrna hming ziak lakkhawm nghal a ni a, a hnu lawk aṭangin an khawpui Reykjavik-ah duh lohna leh bang tura duh lantirin mipui an pungkhawm nghal.

British PM David Cameron-a pa, Ian Cameron pawh lehkha put chhuak aṭang hian Mossack Fonseca dawrtu zinga mi a ni tih a lang a, China president Xi Jinping leh China ram hruaitu lian dang pahnih, an hming tarlan lohte chu ram dang firm-te nen inzawmna an nei tih hmuhchhuah a ni bawk. Hemi chungchangah hian China sorkar chuan engmah a la sawi chhuak lo.

Mossack Fonseca-a lehkha pawimawh maktaduai 11 zet chu German chanchinbu Sueddeutsche Zeitung hnenah hlan a ni a, he chanchinbu hian International Consortium of Investigative Journalists-ah a hlan chhawng leh a ni. International Consortium of Investigative Journalists-ah hian ram 78 aṭangin media pawl 107 zet an tel.