Israel sipaite'n Khan Younis an hual

Israel chuan Hamas beihna avanga Thawhṭannia an sipai 24 an chan hnuah, Gaza Strip chhim lama khawpui lian ber, Khan Younis chu an sipaite'n an hual vek tawh tih a sawi.

Khan Younis-ah hian Hamas hruaitute chuan Israel mi an mante chu tunnel-ah an bihrukpui mek nia hriat a ni. Israel sipaite hian khawpui chhung ṭhenkhat hi lutin, an dap mek a ni.

Israel sipaite hian Gaza hmar lama Hamas hmunte an laksak hnuah, nikum December thla tir lam aṭang khan Gaza chhim lam hi an bei chhunzawm leh a ni. Ni rei lote hnuah Khan Younis khaw laili hi a luhchilh thei tawh dawn niin an sawi. Israel Defence Force (IDF) chuan Khan Younis hmar lam biala chengte chu an himna turin Mediterranean tuipui lam, Al-Mawasi lama insaseng turin an hriattir lawk bawk. Israel sipaite hi Hamas chuan na takin an lo do let bawk a, Khan Younis Brigade hi Hamas hnuaia pawl chak ber pawl nia ngaih an ni.

Israel-in thla hnih inkahhai puan rawtna siam

Israel chuan Qatar leh Egypt palaite kaltlangin, Hamas firfiak pawl chu an mi tangte inthleng tawnna turin Gaza Strip-a thla hnih chhung inkahhai puan rawtna a siampui nia sawi a ni.

Hemi chungchang hi US news site, Axios chuan tarlangin, Israel official-te chuan inremna hi stage hrang hranga kalpui tum a nih thu leh, a hmasa berah tang zinga hmeichhiate inthleng tawn hmasak ber a, a dawtah mipa kum 60 chung lam, a hnuah natna neite tia kalpui an ruahman tih an sawi. Rawtnaah hian tang inthleng bakah Hamas mi hren zinga thi tawh ruang hlan chhawnte pawh a tel bawk. An inrem theih chuan Israel hian an ram jail-a Palestinian tang tam tak a chhuah dawn a, a zat tur tak erawh sawi lan a la ni lo.

Israel-in rawtna a siamah hian thla hnih inkahhai puan tih niin, indo tihtawpna tur erawh a tel lo thung. Mahse Gaza Strip khawpui hrang hranga Israel sipai dah zat erawh titlem a, indona avanga Gaza hmar lama cheng, hmun danga tlanchhiate pawh an awmna ngaia an kir leh phalsak tihte a tel bawk.