New Zealand-in Red Sea-ah defence team tir dawn

Yemen-a Houthi hel pawlte'n Red Sea-a lawng lian kalte an beih mek karah, New Zealand chuan Red Sea security puitu tur member paruk awmna defence team tirh a tum tih a sawi.

United States leh Britain chuan Iran thlawp, Houthi helhoin Red Sea an beih chhan letna atan, Yemen-a helpawlho hmunte an lo bei let tawh bawk.

New Zealand prime minister Christopher Luxon chuan Houthi helin commercial leh naval ship an bei ṭhin chu an dem thu sawiin, New Zealand chuan Middle East leh hmun dangah pawh lawng liante zalen taka an chetvel theihna tur chu a thlawp zel dawn a ni, a ti. Hemi rual hian Yemen ram chhungah New Zealand defence mi leh sa hi an lut dawn lo a, beihpui thlaknaah pawh an tel dawn tih sawiin, tuipuia lawng liante himna tura hmalaknaah an theih angin an pui dawn a ni, a ti.

Foreign minister Winston Peters chuan New Zealand hmalak tumna chu Israel-Hamas indona thleng chungchang nena sawi zawm tur a ni lo tih a tarlang bawk a ni. Houthi hel hian Red Sea an beihna chhan hi Gaza Strip-a Palestinian firfiak pawl, Hamas laka Israel-in beihpui a thlak mek an duh lohna lantirna niin an sawi a ni.