China-in Pakistan venhim a tiam

Iran nena boruak ṭha lo tak nei chho mek, Pakistan ram chu China chuan a thlavang hauhsakin, venhim a tiam.

January 16 khan Iran hian Pakistan rama Sunni firfiak pawl, Jaish al-Adl hmun nia a sawi, Balochistan province-a mi chu missile leh drone hmangin a kap a ni. Hei hian Pakistan a ti lawm lo hle a, a chhan letna atan Iran-a firfiak pawl hmun nia a sawi chu a kap zui ve bawk. Heng thil avang hian ram pahnihte inkar hi a ṭha lo hle a ni.

Ram pahnihte inkar boruak ṭha lo siam ṭha tur hian China chuan hmalak a tum thu a sawi. China foreign ministry thupuangtu, Wang Wenbin chuan Iran leh Pakistan-in an inhriatthiam lohnate siam ṭhat tuma hma an lakna chu China chuan lawmawm a ti hle a, boruak ṭha tak hnuaia inbiakna neih hmangin inzawmna leh thawh dunna ṭha zawk a neih zel pawh a duh a ni, a ti. Hemi rual hian Pakistan-in a ram himna venghim tura a beihna chu a thlawp a, venhimpui a tiam tih a sawi bawk.

Iran leh Pakistan hian an inkar boruak siam ṭhatna turin an ambassador-te chuan inbiakna an neih chhunzawm tur thu an sawi. January 29 hian Iran foreign minister Hossein Amir-Abdollahian chuan Pakistan tlawh a tum bawk a ni.