Israel leh Bhutan-in inremna an ziak

Israel leh Bhutan ram chuan kar liam ta Inrinni khan inlaichinna siamna tur inremna an ziak. 

Ram pahnih aiawhte chuan thuchhuah inṭawm siamin, he inremna hian Israel leh Bhutan inkarah thawhdunna ṭha leh inzawmna nghet zawk a siam dawn a ni, an ti. Thawhdunna tur inremna hi India rama Israel ambassador, Ron Malka chenna inah Malka leh India-a Bhutan ambassador, major general Vestop Namgyel ten an ziak a ni.  

Israel ministry of foreign affairs chuan ram pahnihte hian kum tam tak chu inlaichinna ṭha siam tumin a rukin inbiakna pawh an lo nei fo tawh tih a sawi a, inremna an siam thei ta chu lawmawm a tih thu a tarlang. 

Israel foreign minister Gabi Ashkenazi chuan Israel pawmtu ram chu an pung zel a ni tiin, Bhutan ram nena inlaichinna tur an siam chu Israel-in Asia ramte a thawhpuina tihngheh belhna tura mel lung pawimawh tak a nih thu a sawi. 

Prime minister Benjamin Netanyahu pawhin a twitter-ah inremna siam a ni thei ta chu lawmawm a tih thu sawiin, ram dangte pawh thawhpuina leh inzawmna ṭha siampui tumin an be mek tih a sawi a ni.