Russia-in thlawhtheihna kap thlaah Ukraine a puh

Russia chuan Nilaini khan Ukraine sipai an man, tang inthlengna tur atana an hruai phurtu thlawhtheihna chu Ukraine-in a kap thla niin an sawi.

Thlawhtheihna tlakna hmun hi Ukraine ramri bul, Russia ram khawpui pakhat Belgorod bul mai niin an sawi. Sipaite phurhna atan hian Russia chuan sipai bungraw phurh nana an hman, lyushin Il-76 an hmang a ni.

Russia defence ministry chuan Ukraine-in an kah thlak nia an sawi, thlawhtheihnaah hian indonaa an man, mi tang (Prisoner of War) 65 bakah Russia mi, thlawhtheihna khalhtu leh enkawltu paruk leh Russia sipai pathum an chuang tel niin a tarlang. Ukraine thiltih dan chu a nunrawnthlak hle tih sawiin, mi 74 nunna an laksak a ni, a ti.

Russia foreign minister, Sergei Lavrov pawhin he thil thleng avang hian Russia chuan United Nations Security Council emergency session a koh thu sawiin, Ukraine-in thlawhtheihna a kah thlak chu pawikhawihna a nih thu leh, UNSC session chu Ukraine insawifiahna ngaithla tura ko an nih thu a sawi.

Lavrov hian sipai an mante chu Russia leh Ukraine sorkarin inremna an neih anga tang inthlengna tura Belgorod hmuna phur an nih thu sawiin, Ukraine sorkar chuan Kharkov hmun aṭangin sipai tang phurtu thlawhtheihna chu an rawn kah mai thu a sawi a ni. Hetih lai hian Ukraine hian thlawhtheihna hi an kap thla em tih erawh an sawi lo thung a, thlawhtheihna chhungah hian Ukraine sipaite an awm em tih pawh tarlan a ni lo a ni. Ukraine hian Russia aircraft, missile phur nia an hriat tawh phawt chu an kah zel tur thu erawh an lo sawi tawh a ni.