Saudi Arabia-in kum 70 chhunga zu dawr hmasa ber hawng dawn

Saudi Arabia chuan kum 70 chuang an rama zu zawrhna dawr an neih loh hnuah, Muslim ni lote tana dawr theih turin Riyadh-ah zu dawr siam a nih tur thu an sawi.

Saudi official-te chuan zu dawr siam chuan dan loa ram dang aṭanga zu lak luh a tihtlem theih an beisei thu an sawi.

Zu dawr hi ram dang palaite tan chauha zu lei theih tura ruahman a ni a, khawpui laili aṭanga thlang lam, Riyadh's Diplomatic Quarter-ah a awm dawn niin an tarlang. Zu dawr hi kar khat chhunga hawn hman tum a ni a, zu lei thei leh lei theih dana inkaihhruaina an siamah ram dang palaite chu in-register hmasain, sorkar phalna an hmuh hnuah an lei thei ang a, kum 21 hnuai lam tan zu dawra awm phal a ni dawn lo a ni. Zu dawrah hian thawmhnaw pangngai lo hak phal a ni lo a, zu lei turte'n driver an tirh phal a ni lo a, thla tina zu lei theih zat an bithliah dawn bawk a ni.

Saudi dan hnuaiah hian zu in leh zu kawl hremna chu pawisa chawi, tan ina tan, khawlaia invuak, leh khualzinte tan an ram aṭanga thawn chhuah thlengin a huam a, hei vang hian Riyadh-ah hian zu zuar dawn mah se, Saudi dan khauh tak avang hian ualau taka zu in leh zu ruih chu thil tihchi ber a ni dawn lo a ni. Saudi bakah hian Gulf ram dangte pawhin hetiang deuh hian zu zawrh dan an kalpui mek a, Muslim ni lo, kum 21 chung lam tan hotel leh bar velah chuan zu lei leh in an phalsak.

Kum 1952 aṭang khan Saudi Arabia-ah hian zu khap a ni a, hei hi an lal, King Abdulaziz-a fapa pakhatin zu a ruih laia British palai pakhat a kah hlum vang a ni. Saudi-a zu khapna avang hian ram dang palaite chuan an ram aṭanga zu inthawntir a ngaih phah a, hei hi diplomatic pouches tiin, anmahni in tur zu an la lut chawp ṭhin a ni.