ICJ-in Israel chungchang a ngaihtuah dawn

International Court of Justice (ICJ) chuan vawiin hian Gaza Strip-a Israel-in beihpui an thlak chungchangah hrem an ngaih dawn leh dawn loh an ngaihtuah dawn. Israel lakah hian South Africa chuan thubuai theh lutin, Israel chu Gaza-ah hian insuatna beihpui thlakah a puh a ni.

Israel chuan insuatna kalpuia an puhna hi a dik loh thu a sawi thung a, Palestinian firfiak pawl Hamas-te beihna laka invenghim tura dikna an neih thu leh, nikum October 7-a Hamas-te'n Israel inralring lo lai an beih thut avang khan mi 1,139 boralin, Hamas-te'n mi 240 dawn an la hreng zui tih a tarlang ve bawk.

ICJ-a thubuai lutte hian hun a duh rei ṭhin hle a, thutlukna siam tur hian kum 3-4 te a ngai ṭhin. Israel sipai chetdan chu sawiho mah se, titawp tura thu an pek mai erawh a rinawm loh nia sawi a ni. Nikum December thlaa UN resolution siama Israel chu sipai hmanga beihpui an thlaknaah dan pela che lo tur leh chhawmdawlna tibuai lo tura an lo tarlan tawh chu ICJ chuan Israel sorkar chu a hriattir nawn leh rin a ni bawk.

Israel chungchang ngaihtuahnaah hian thubuai theh luttu ram, South Africa foreign minister Alendi Pandor chu rorelna ngaichang tur hian a kal dawn niin sorkar thupuangtu chuan a tarlang.