SKorea-ah ni hnih chhungin hri kai thar an tam Khuahkhirhna khauh zawk hman ngai maithei

South Korea ramah ni hnih chhungin Covid-19  kai thar an pun nasat avangin president Moon Jae-in chuan hri darh zel tur venna atan khuahkhirhna khauh zawk hman a ṭul mai thei tih a sawi. 

Kar liam ta Inrinni khan hri kai thar hi mi 950 awmin, nimin khan mi 1,030 an awm belh leh bawk. Hri kai hmuh thar zinga 1,002 chu ramchhung aṭanga kai an ni. Ram pumah hri kai hmuh tawh hi mi 42,766 ni tawhin, an zinga 580 in an thihpui tawh a ni. 

Ni hnih chhung hri kai hmuh thar an pun nasat avangin nimin khan Presidetn Moon chuan Central Disaster and Safety Countermeasures Headquarters-ah emer­gency meeting a ko nghal. 

Meeting-ah hian hri leng thunun a nih theihna atan nasa zawk an beih a ṭul thu sawiin, hri leng chu thunun nghal  theih loh chuan, khuahkhirhna khauh zawk, level 3 restric­tion an hman a ngai dawn tih a sawi. 

South Korea hi hri leng dona kawnga thawk leh hlawhtling ber ram zingah a tel. Hei vang hian khuahkhirhna siamte pawh thladul chhoh a ni tawh a, level 2.5 restriction a hmang mek a ni. Mi 50 chin punkhawm phalsak niin, restaurant-te pawh zan dar 9 thleng an inhawn phalsak an ni. 

Hri lengin ziaawm lam a pan thuai loh chuan level 3 restriction hi an hman a ngai dawn a, hemi awmzia chu lockdown puan a ngai dawn tihna a ni. Hei hi hman a nih chuan hri len hnua SKorea-in a ṭum khatna atana lockdown a puanna tur a ni ang. 

School-te chu online-a kalpui a ni ang a, company-te pawh hnathawktu tlemte chauh kal phalsak niin, mi 10 aia tam punkhawm khap a ni bawk ang. 

Sorkar chuan ram chhunga hospital hrang hrangah hri kaite enkawlna khum 10,000 siam belh thuai a ni dawn tih health minister Park Neung-ho chuan a sawi.