CIA leh Mossad hotute'n Qatar leh Egypt palaite hmu dawn

Mossad leh Central Intelligence Agency (CIA) hotute chuan kar lehah hian Gaza Strip-a inkahhai puan dan tur leh, Hamas mi hren mekte chhuah an nih theih dan tur chungchang sawipuiin Qatar prime minister Sheik Mohammed bin Abdulrahman Al-Thani an hmu dawn. Meeting-ah hian Egypt intelligence chief Abbas Kamel pawh a tel ang.

CIA director William Burns leh Mossad chief David Bernea-te hian Hamas firfiakte'n October 7-a Israel an beih ṭuma an man, tun thleng an la hren mek mi 132 te chhuah an nih theih dan leh, Gaza Strip-a Israel leh Hamas indona thleng mek chawlh lailawk a nih theih dante an sawipui dawn a ni. He hunah hian Shin Bet chief Ronen Bar pawh a tel dawn niin Israel media chuan a tarlang. Qatar leh Egypt hian Gaza-a indona thleng mekah, Israel leh Hamas-te inremna siama inkahhai an puan theihna tura hma lain, palai hna an thawk a, a hma pawhin Burns leh Barnea hian ram pahnih official-te hi an lo hmu tawh bawk.

Ningani zan khan Israel war cabinet chuan Tel Aviv-a Kirya military headquarters-ah meeting an nei a, Hamas mi hren mekte chungchang an sawiho.

Hamas hian Israel-in Palestinian mi a man zawng zawngte a chhuah a, Gaza aṭanga Israel sipaite la chhuak vek a, indona a tihtawp chuan Israel mi an hren mekte chhuah an remtih thu an sawi a, mahse, an rawtna hi Israel chuan a pawm lo. Israel lam hian thla hnih chhung inkahhai puan a, hemi chhunga an mi tangte inthleng tawn a rawt a, Hamas lamin an hnawl ve bawk. Mahse Egypt official-te chuan inremna a awm theihna atan inbiakna hi an neihpui chhunzawm zel dawn tih an sawi.

Nikum November thla khan Israel leh Hamas hian kar khat chhung indo chawlhsan a, tang inthleng tawnna turin inremna an siam a ni. Hemi chhung hian Hamas hian an mi hren zinga mi 100 vel chhuahin, Israel pawhin an ram jail hrang hranga Palestinian mi tang zinga mi 240 an chhuah ve bawk. Israel thuneitute chuan Hamas hian mi 132 an la hreng a, an zinga mi 28 chu an thi tawh nia rin a nih thu an sawi bawk.