US leh UK-in Houthi hruaitute hrekna siam

United States leh United Kingdom chuan Yemen-a Houthi firfiak pawl hruaitu palite hrekna an siam.

US leh UK-in a hrekte hi Houthi defence minister Mohamed Nasser al-Atifi; Houthi naval forces commander Muhammad Fadl Abd al-Nabi; coastal defence forces chief Muhammad Ali al-Qadiri leh Muhammed Ahmad al-Talibi-te an ni. Heng mite hi Red Sea-a lawng lian beih an nih ṭhina inhnamhnawih leh thupek petute niin an sawi a, Yemen ram himna tichhetu an ni tih an sawi bawk.

Hetih lai hian Houthi hian Hamas-ho an thlawpna lantir nan Red Sea-a Israel nena inzawmna nei, sumdawng lawng liante beih chhunzawm zel an tum thu an tarlang. Houthi leader Abdel-Malek al-Houthi chuan Gaza Strip-a ei tur leh damdawite thawn luh a nih loh chuan Red Sea leh Gulf of Aden chu an bei zel dawn tih a sawi. Nikum November thla aṭang khan firfiak pawl hian Israel nena inzawmna nei nia an puh sumdawng lawng lian eng emaw zat an lo bei tawh a ni.

Houthi-te beihna avangin Red Sea-ah shipping traffic pawh 15% velin a tlem phah a, company tam tak chuan an lawngte chu kawng thui zawk ni mah se Africa lam aṭangin an kaltir a ni.

Tun thla tir lam khan US chuan Houthi hi “Specially Designated Global Terrorists” (SDGTs)-ah a puang a, US himna tiderthawng thei niin an sawi.