Israel-in UN agency-a thawkten Hamas an pui niin puh : Ram 8-in Palestinian-te chhawmdawlna pek titawp

UN agency for Palestinian refugee, United Nations Relief and Works Agency (UNRWA)-a thawktu zinga eng emaw zatin Hamas firfiakte an pui nia sawi a nih hnuah, UNRWA kaltlanga Palestinian-te chhawmdawlna pe ṭhin ram pariatte chuan an chhawmdawlna pek an titawp.

Israel chuan October 7, 2023-a Hamas-ten Israel an beih ṭum khan UNRWA staff ṭhenkhat an inhnamhnawih ngei a ni tih agency hnena a hriattir hnuah, Australia, Canada, Finland, Germany, Italy, the Netherlands, UK leh US chuan UN agency tana fund an pek ṭhin an titawp rih a ni.

UN agency chuan hemi chungchang hi an chhui chian mek thu leh, staff inhnamhnawih nia sawite pawh an ban thu an sawi. Fund titawp ramte chu an thutlukna ngaihtuah ṭha leh turin a ngen bawk.

UNRWA hi kum 1949-a din niin, Gaza, West Bank, Jordan, Lebanon leh Syria-a Palestinian-te tan healthcare, zirna leh chhawmdawlna dangte a pe ṭhin. Gaza bikah hian thawktu mi 13,000 vel an awm.

Hamas-ten Israel an beih avanga Israel-in sipai chakna hmanga Gaza Strip-a beihpui a thlak hnuah, UNRWA chuan an hmun hrang hrangte chu indona hlaua tlanchhia, civil mite awmna atan a hman tir a ni.

Israel hian UN hnuaia branch hrang hrang, UNRWA ngei pawh telin, Israel leh Palestinian-te inkara buaina chhuakah hleih neih taka thil ti ṭhin leh, Juda mi huatna pawh kalpui ṭhinah a lo puh fo tawh a ni.

Israel prime minister Benjamin Netanyahu-a adviser, Mark Regev chuan nikum October 7-a Palestinian firfiakten Israel an beih ṭum khan, UNRWA hnuaia hlawh late pawh an tel a, UNRWA school-a thawkte zirtirtu ṭhenkhat pawhin Israel beih a nih kha langsar takin an lo lawm bawk niin a sawi. Hamas-ten an hren zinga an chhuah tak pakhat pawhin, UNRWA hnuaia thawk mi pakhat inah hren a nih thu a sawi. Regev chuan UN chuan UNRWA leh Hamas-te inzawmna neih dan chu a chhuichian thuai a ngai a ni, a ti.

UK Foreign Office chuan Inrinni khan thuchhuah siamin, rawng taka Israel beih a nih ṭuma UNRWA staff-te an inhnamhnawih ni a sawi chuan a ṭhawng hle a, UK sorkar chuan he thil hi a dem takzet a ni, a ti. Hei vang hian UK chuan UNRWA tana sum a pek ṭhin chu a titawp rih dawn a, thil awmdan pawh an zirchiang dawn tih a tarlang.

US State Department pawhin UN agency tana sum a pek belh tur chu a titawp rih tih sawiin, agency staff-te chungchang chuan a tilawm lo hle tih a sawi. EU chuan UNRWA staff-te puhna chungchang hi chhui chian a nih hnuah, a ṭul angin hma an la dawn tih a sawi ve bawk. US, Germany leh EU-te hi UNRWA donor lian zinga mi an ni.

UN secretary general Antonio Guterres chuan he thil hian a ṭhawng takzet tih a sawi a, UNRWA chungchang chu chhuichiang leh ennawn thuai a ni dawn tih a sawi. Donor state-te chu an fund pek titawp lo turin a ngen bawk.

Palestinian leh Hamas official-ten an dem

Khawtlang ram ṭhenkhatin UN agency funding an titawp chu Palestinian leh Hamas official-te chuan an dem tih sawiin, Palestinian mipuite dinhmun hlauhthawnawm takah an dah a, an thutlukna pawh sut leh thuai tura an duh thu an sawi.

UNRWA commissioner-general Philippe Lazzarini chuan, fund tihtawp hian Gaza-a chhawmdawl hna thawh nasa takin a tibahlah a, mipuite rilṭama an awm mai a hlauhawm thu a sawi.

Palestine Liberation Organisation (PLO) secretary general Hussein al-Sheikh chuan Palestinian mipuiten harsatna nasa tak an tawh lai, ram leh pawl hrang hrangte puih an mamawh ber lai a ni tih a sawi ve bawk.

ICJ-in inkahhai chungchangah order siam lo

International Court of Justice (ICJ) chuan kar liamta Zirtawpnia Israel chungchang a ngaihtuahnaah, Gaza Strip-a hnam insuatna ang zawnga kalpui lo tura ruahmanna siam turin a hriattir. Hemi rual hian inkahhai puan chungchangah erawh thupek engmah a siam lo thung.

Israel-in Gaza Strip-a beihpui a thlak chungchangah, South Africa chuan ICJ-a hian Israel chu insuatna kalpuia puhin an lakah thubuai a thehlut a, Zirtawpni khan ICJ hian thubuai thehluh hi ngaihtuahin, president judge Joan Donoghue kaihhruaina hnuaiah minute 45 chhung an ngaihtuah a ni. Israel chu Gaza-a civil mite hnena basic service leh chhawmdawlna a luh phalsak turin a ti bawk. Court thupek hi a zawm ngei a ni tih lantir a, a chet lak dante thla khat chhunga report turin Israel hi a hriattir bawk a ni. Israel hi UN member a nih avangin ICJ thurel hi pawm leh zawm ngei tura tih a ni a, mahse international court hian a thupekte zawm tura nawr luih theihna erawh a nei lo.