North Korea-in a ram chhim lamah missile enchhin

South Korea Joint Chief of Staff chuan nimin khan North Korea-in a ram chhim lamah missile a kapchhuak tih a sawi, hei hi kar liamta chhunga an vawihnih kah chhuahna a ni.

Missile-te hi zing dar 8 vel bawr a kah chhuah an nih thu sawiin, US leh South Korea intelligence-te chuan uluk taka an thlithlai reng thu an sawi. Missile engzat nge a kahchhuah erawh an sawi lang lo thung.

South Korea sipai hotu chuan,"Enthlak hna hi uluk leh chak taka kalpui reng a ni a, kan sipai leh US sipaite chu ṭha takin an thawkdun reng a, North Korea chet dan chu uluk takin kan vil reng a ni," a ti. Missile an kahchhuah hnuhnung ber hi North Korea-in an cruise missile thar, nuclear pai tel thei Pulhwasal-3-31 an kahchhuah hnu ni reilotea an kahchhuak leh a ni. North Korea hian an cruise missile, nuclear paitel thei hi a ṭum khatna atan September 2021 khan a lo enchhin tawh a ni. US leh a thawhpui hmachhawn an hrehloh zia an tihlanna niin mi tam takin ngai mah se US leh SKorea lam hian NKorea lamin ralthuam an che lek chu hlauhthawnawm a nih loh thu an sawi thung.

NKorea hotu, Kim Jong-un kaihhruai sorkar hian ballistic missile thuamṭhat kawngah hma a la nasa hle a, Russia nena an inkungkaihna pawh an sawh ngheh zel bakah South Korea nena rorelna pakhat hnuaia awm leh an tum loh thu a tichiang tawh bawk. Heng avang hian US leh a thawhpuite laka chet lak emaw dodal zawnga an kalzui zel emaw ring an tam hle a ni.

North Korea state media KCNA chuan nimin khan thuchhuah siamin, US leh South Korea ten sipai drills an neihdun chu thil dik anih loh thu leh, chhan letna pek ngei an tum thu a sawi. KCNA chuan ramdangin an nuclear ralthuam hmachhuanin North Korea chu kumin kumtir aṭang khan an rum ṭhaih reng thu sawiin, North Korea lam pawh indonna thleng thut thei hmachhawn turin a inralring reng tih a tarlang bawk.