Iran-in satellite 3 kap chhuak

Iran chuan van thengrengah satellite pathum hlawhtling taka an kah chhuah thu nimin khan a sawi.

Sorkar hnuaia IRNA news agency chuan tun hma lama vawi tam tak an lo hlawhchham pui tawh, Iran Simorgh rocket chu hlawtling taka hman a ni tih a tarlang. State TV chuan Simorgh rocket kah chhuah lai footage hi a rawn tilang a ni. An thlalak aṭanga a lan danin, Iran-a Semnan province-a Imam Khomeini Spaceport aṭanga kah chhuah a ni.

State TV chuan an satellite kah chhuahte chu - Mahda, Kayhan-2 leh Hatef-1 te an nih thu a sawi a, Mahda chu research satellite niin, Kayhan-2 leh Hatef te chu nano satellite an ni thung. Simorgh programme hnuaiah Iran hian satellite kahchhuah a tum hi ṭum nga a lo hlawhchham tawh a ni.

US chuan Iran-in satellite a kah chhuah hi UN Security council resolution palzutna a nih thu a hmain a lo sawi tawh a, satellite launch vehicle lam tihhmasawnna hna a kalpui hi an technology hman a inang avangin interncontinental ballistic missile a siam tumna niin a puh. Tun ṭuma Iran-in satellite a kah chhuah chungchangah hian US sorkar in sawi a la nei lo thung.