China hnenah Pakistan-in ṭanpuina an ngen

Pakistan ramchhung sum dinhmunin ziaawm lam a pan theih loh avangin, a ṭhianṭha China hnenah USD tluklehdingawn 2 puk tir turin ṭanpuina a ngen.

Pakistan Prime Misnister Anwaarul Haq Kakar chuan China Premier Li Quiang hnenah lehkha thawnin, USD tld 2 puk tir tura dilna a thlen niin thuthar thehdarhtute chuan an sawi. A lehkhaah hian Pakistan PM hian China-in Pakistan sum harsat laia an lo puih tawhnaah lawmthu sawiin, sum an puk tir chuan Pakistan- in ramdang laka a ba rulh nan an hman ṭangkai bakah Pakistan Forex Reserve pawhin ziaawm lam a pan theih phah dawn a ni, a ti. China hian Pakistan chu USD tld 4 a lo puktir tawh a ni. Pakistan chuan thla tir lam khan UAE hnen aṭangin USD tld 2 bakah Saudi Arabia hnen aṭangin USD tld 5 a lo puk tawh bawk.

Pakistan sum dinhmun hi a ṭhatloh avangin International Monetary Fund (IMF) hnenah pawh ṭanpuina an ngen a, mahse IMF hian sum a puktir dawn hian tihtur bituk a ngah ṭhin em avangin Pakistan hian thutlukna a la siam thei lo.

Finance minister hlui, Ishaq Dar chuan an party, Pakistan Muslim League-Nawaz (PML-N)-in inthlan lo awm tura hnehna an chan theih chuan IMF nena thawhdun tur a ni em tih chu an tichiang dawn tih a sawi. An party chuan IMF ruahmanna an pawm dawn lo a nih chuan an sum dinhmun siamṭhat nan inrenchem taka kal a ngaih tur thu a sawi bawk. IMF hian Pakistan sum dinhmun hi an vil ve reng a, Pakistan rama sorkar kum kal mek ah an sum mamawh phuhruk nan USD tld 25 puk an mamawh dawn niin an sawi.

Kum 2023 thlenga Pakistan-in ram hrang hrang laka an pawisa bat tlingkhawm chu USD tld 125 zet a tling a ni, heng zinga hmun thuma ṭhena hmun khat chu China lak an ba a ni. Ruahmanna felfai tak nena an sum dinhmun harsatna hi an hmachhawn a nih loh chuan Pakistan economy hi a tlukchhiat hlen mai a hlauhawm niin mithiamte chuan an sawi.