Pakistan PM hlui Imran Khan kum 10 tang turin hrem

Pakistan court chuan an ram prime minister hlui, Imran Khan chu sorkar thuruk tiputrua puhnaah Offficial Secrets Act hnuaiah thiam loh chantirin, kum 10 lung-in tang turin a hrem.

Imran Khan bakah a thawhpui, foreign minister hlui Shah Mehmood Qureshi pawh he thubuai kaihhnawihah vek hian kum 10 tang tura hrem a ni ve bawk.

Islamabad-a special court judge Abual Hasnat Muhammad Zulqarnain chuan cipher case-a tia sawi chungchanga hremna pek hi a puang a ni. Imran Khan hian hremna pek hi court sang zawkah a appeal thei ang.

Imran Khan hi Pakistan prime minister a nih laia US-a an ram ambassador-in sorkar hnena thuruk a thawn chu a hnua tidarhah puh a ni. A party, Pakistan Tehreek-e-Insaf (PTI) chuan Imran Khan leh Shah Mehmood Qureshi-te hremna pek chu an khing let dawn tih sawiin, thubuai siamsak an nihna chu thu dik tawk lo niin an sawi bawk. PTI chuan, "Pakistan chuan Pakistan venghimtu, Imran Khan leh Shah Mehmood Qureshi-te chu a thlawp zel dawn a ni," tiin an tarlang. `

Kum 2022 khan kum 71 mi, Imran Khan hi vote of no-confidence hmangin prime minister a nihna aṭanga paihthlak a ni. Hemi hnu hian thubuai 150 chuang siamsak a ni tawh. Eiruk thubuaiah thiam loh chantirin kum thum tang tura hrem a lo ni tawh bawk a, tunah hian jail-ah a tang mek a ni. Firfiak zawnga che a puhna te, tharum thawhna chawk chhuak tura mipui fuiha phurna thubuaite pawh siamsak a ni.