US-in 2023-ah ralthuam USD tld 238 man a hralh chhuak

US chuan nikum chhung khan ram dang hnenah ralthuam ṭhahnem tham tak a hralh chhuak a, a ralthuam hralh chhuah hi USD tld 238 hu a tling.

State department-in a tarlan danin, ralthuam hralh chhuah zinga USD tld 81 hi sorkarin direct-a a hralh niin, hei hi kum 2022 aiin 56% in a tam zawk. A bak hi US defence company-ten ramdang hnena direct-a an hralh a ni bawk.

Poland chuan US hnen aṭang hian Apache helicopter, USD tld 12 man a lei a, hei bakah hian USD tld 10 man High Mobility Artillery Rocket Systems (Himars) leh USD tld 3.75 man M1A1 Abrams tank-te leh, USD tld 4 man Integrated Air and Missile Defence Battle Command Systems te a lei bawk. Prime minister Donald Tusk chuan an sipaite thuam chakna programme kalpui chhunzawm zel a tum thu sawiin, Poland chu Europe-a land force chakna bera siam a tum tih a sawi.

US hnen aṭanga Chinook helicopter leina atan Germany chuan USD tld 8.5 a seng a, Bulgaria pawhin USD tld 1.5-in Stryker armoured vehicle leiin, Norway chuan USD tld 1 man multi-mission helicopter a lei. Czech Republic chuan F-35 jet leh munition, USD tld 5.6 man hu a lei bawk a ni.

US dawtah Russia ram chu khawvela ralthuam hralh hnem ram a ni reng ṭhin. Mahse Ukraine a run hnuah ram tam takin an ensan avangin, Russia dawr ṭhinte chuan US lam an hawi a, hei vang hian US ralthuam hralhchhuah hi nasa takin a pung chho a ni.

Europea ram pawn lamah, South Korea chuan USD tld 5 man F-35 jet, Australia-in USD tld 6.4 man C130J-30 Super Hercules plane leh Japan-in USD tld 1 man E-2D Hawkeye surveillance plane-te an leisak bawk.