Imran Khan hremna pek belh leh

Pakistan prime minister hlui, Imran Khan chu Thawhlehni khan Islamabad-a special court-in state thuruk tiput rua puh a nih chungchangah kum 10 tang tura a hrem hnuah, nimin khan a nupui Bushra Bibi nen eiruk thubuaiah thiam loh chantirin, kum 14 tang tura hremna pek belh leh a ni.

Kum 2022-a Prime Minister a nihna aṭanga paihthlak a nih hnuah, Imran Khan hi thubuai tam tham tak siamsak a ni tawh. Mahse Khan chuan an puhna hrang hrangte hi phain, politics lama an beihna kawng khat niin a puh thung.

Pakistan hian kar leh, February 8 hian inthlanpui an nei dawn a, inthlang tura inbuatsaih mek karah Prime Minister hlui hi a ni zawnin thiam loh chantirin, hremna hi pek a ni. A hmain Imran Khan hi inthlana a din khap a ni a, a party, Pakistan Tehreek-e-Insaf (PTI) pawh inthlanna neih tur atana an campaign khapsak an lo ni tawh bawk.

Nikum August thla khan Khan hi man niin, Rawalpindi-a Adiala jail-ah a tang mek. Nimina hremna pek belh an nih leh tak avangin, a nupui Bushra Bibi pawh jail thuneitute kutah a inpe leh a ni. An nupa hian Imran Khan-a'n prime minister a nih anga thilpek a dawnte chu an mimal ta anga kawl zui leh, a ṭhen chu hralhah puh an ni. Thilpek an dawn zingah hian Saudi Arabia Crown Prince-in a pek, jewellery set pawh a tel. He thubuai, Toshakhana case tia sawiah hian thiam loh changin, kum 14 tang tura hrem an nih bakah, court chuan an ram pawisa, rupees tld 1.5 (USD mtd 4.2) chawi tur leh, kum 10 chhung politics khel thei lo turin a hrem bawk.

Report chuan Khan leh a nupui hian PM office an luah lai hian ram hrang hrang hotute hnen aṭangin thilpek 108 dawngin, heng zinga 58 chu an kawl zui a ni. An kawl zui duh a nih pawhin sorkarah theh lut phawtin, a man hu an pek hnuah an nei hlen thei a ni. Mahse Khan-te nupa hian sorkarah an theh lut hmasa lo a, a man hu nia an sawi pawh a tlem lutuk niin an tarlang.