Nelson Mandela thil neih lilam tum ṭhulh

South Africa-a mipui thlan President hmasa ber leh, vun rawng inthliarna dodaltu langsar, kum 2013-a boral, Nelson Mandela thil neih ṭhenkhatte lilam tum chu South African cultural heritage humhalhtu pawlin an dodal avangin ṭhulh a ni.

New York-a Guernsey auction house chuan February 24 hian online hmangin Mandela thil neih eng emaw zat hi lilam an tum a, lilam tura tih zingah hian a Ray-Ban sunglass, 'Madiba' kawr, tan in aṭanga a lehkhathawn ziah bakah, US President hlui Barack Obama leh a nupui, Michelle-te'n blanket an pek te pawh a tel. Guernsey auction house chuan lilamna aṭanga an sum hmuhte hi Mandela phumna, Qunu khuaa Mandela Memorial Garden siamna atan hman tum a nih thu an sawi bawk.

Mahse South Africa mipuite leh sorkar ngei pawhin an thil lilam tum hi nasa takin an sawisel a, South African Heritage Resources Agency, or SAHRA chu court-ah zualkoin, lilam hi dang turin an ngen. Hemi hnu hian Guernsey auction house chuan lilam an neih tur chu ṭhulh a nih thu an puang a, a chhan erawh an sawi lang lo thung.